羅康瑞昨日於佛山嶺南天地「嫁娶屋」出席記者會，林子祥和葉蒨文(Sally)擔任表演嘉賓。太太朱玲玲全程陪伴羅康瑞左右，並充當攝影師，幫老公及阿Lam兩公婆影相。阿Lam同Sally向著穿上中式禮服及花轎出場嘅十對新人唱咗兩首冧爆情歌。

活動完畢後，羅康瑞同朱玲玲一齊接受訪問，因屬瑞安房地產旗下業務，難怪羅生同朱玲玲齊齊賣花讚花香，朱玲玲仲話如果早一年落成，咁囝囝霍啟剛同新抱郭晶晶就可以喺呢度擺酒。有人即提議孫兒百日宴到此擺酒，佢就話:「唔嘞。」或叫啟山？朱玲玲就謂:「唔會勉強，但都會叫佢嚟睇吓。」

問朱玲玲和丈夫羅康瑞會否在此補影婚紗相？朱玲玲笑道:「年頭影過一次(普通相)，不過我都做人阿嫲，之前(結婚)都好簡單啫。」羅康瑞亦為妻解圍:「佢鍾意影人，唔鍾意畀人影。」羅康瑞自嘲唔係好嘅模特兒，故不會著禮服俾太太影相；問依家是否弄孫為樂？朱玲玲避談:「唔講嘞。」

Apple Daily | November 16, 2013