林子祥出年年頭開40周年紀念演唱會，「沙麗」葉蒨文早前話過甘願留喺後台做「咕哩」，唔止對伴侶好，沙麗仲好有孝心。

今日（7月29日）下晝3點半左右，陪完阿媽去中環中建大廈覆診嘅沙麗，一見《壹》仔就笑笑口呃水吹，八八卦卦咁問《壹》仔「邊個喺入面（中建大廈）？邊個喺度？」心情甚靚。

天雨路滑，踩住斗零踭嘅沙麗冇有怕，反而同兩個外傭一齊傍實阿媽，左右護法咁款。行到架車附近，佢又落手落腳扶阿媽上車，其他工人喺側邊幫佢手。雖然伯母年紀大有老人病，但有沙麗呢個孝順女日陪夜陪，伯母實好快康復！

Next Plus | July 29, 2015