林子祥完成一連四場紅館「林子祥佐治地球40周年演唱會」，在最後一場，太太葉蒨文（沙麗）和兒子林德信（Alex）依舊現身任嘉賓演唱，而Alex在台上分享與父親的故事，指他很像父親林子祥愛準時，當年在三藩市讀書約父親及沙麗七時食飯，但他六時便到去逛書店，但在書店竟遇上父親，那一刻就知道遺傳了父親的基因。而莎麗再爆阿Lam又靜靜雞買車了，現家中有六部車，又買很多手錶卻不戴錶出街，阿Lam則坐在一旁邊聽沙麗講邊偷笑，最後演唱會阿Lam唱足三小時多才結束。

之後阿Lam、沙麗和Alex一家三口齊齊現身慶功宴，阿Lam接受訪問講到喊足四場，他謂因40周年觀眾給他反應寧舍不同，特別親切，尤其悼念三位好朋友（當中有張耀榮）部份，因過去每次演唱會他們都有參予，但可惜不能和他度過40周年，這個感受最深。 另外問到阿Lam演唱會可會開Part 2？阿Lam表示未諗，但知道今次好多人買不到飛，之後都會到各地巡迴，包括美加、星加坡、澳門等。

說到徐小鳳現身做特別嘉賓，小鳳更提到他人生中三個最重要女人，問到阿Lam誰是第三個重要女人？阿Lam即笑謂：「我都唔知佢講邊個，你哋問番佢啦，佢最叻搞氣氛。（沙麗話你又買車，全屋有六架車？）邊有咁多車，加埋個仔（架車）都係五架啫，啲古董車買番嚟好平，一、兩萬咋，依家仲升咗值𠻹。」

on.cc東網專訊 | February 1, 2016