殿堂級歌手林子祥（阿Lam）在紅館舉行第三場演唱會，其英國老師亦有捧場。甫出場他即落台攬住媽媽唱出《Que Sera Sera》，林媽媽更high爆揈手，阿Lam笑言媽媽今次終於肯捨得放低手袋。之後阿Lam行近粉絲唱《最愛是誰》，感性的他更一度哽咽，但期間有女粉絲衝上前跟他影相，場面搞笑，之後女粉絲更偷襲錫阿Lam臉頰，兩人更一度疑似嘴對嘴，引起歌迷尖叫，眼濕濕的他則謂這些是開心的喊。親民的阿Lam獻唱期間多次行近粉絲跟他們握手、影相和錫面。

沙麗激讚林德信靚仔過阿爸
唱到《Make my day》時，身穿黑色短裙配魚網絲襪的老婆葉蒨文（沙麗）出場獻唱其中一段。然後阿Lam、換上藍色花花過膝裙的沙麗和兒子林德信（Alex）一家三口化身Peter，Paul and Mary合唱，阿Lam笑問沙麗：「頭先嗰個係唔係妳？成日走嚟搶鏡，條裙好短，穿哂崩！」沙麗就笑言叫他不要亂講，又扯開話題問觀眾：「個仔靚唔靚呀？靚過嗰個（指住阿Lam）。」又稱兩父子是「大林」和「細林」。

阿Lam唔需要老婆？
然後沙麗一如過往拿起貓紙大數阿Lam的怪癖，講到阿Lam有五部名車但又愛坐小巴貪其搭車有長者優惠，阿Lam則反駁笑言：「坐小巴唔係為慳錢，而係唔塞車。」沙麗又謂阿Lam喜歡買名牌但亦愛在救世軍買衫，並踢爆阿Lam買衫後會自己改衫：「我夜晚返到屋企就會見到佢喺度用針線縫衫，我好似嫁咗畀個識唱歌嘅裁縫。」她亦謂阿Lam看似慢吞吞，但又很快：「分分鐘佢落完台上咗小巴返上床瞓覺，仲快過我喺度執緊嘢。同埋全世界都好鍾意簽佢，因為佢唔使梳頭錢、化妝錢，乜都唔需要，就嚟連老婆都唔需要。」雖然踢爆老公不少怪癖，但沙麗都力讚阿Lam為演唱會付出很多心思，讚他是真的漢子，之後兩人合唱《選擇》，又攬攬和錫面，十分sweet。

Encore唱到眼瞓
然後阿Lam唱歌悼念已故好友黃霑、林振強等人。到了唱《分分鐘需要你》時，全場大合唱，令阿Lam再次感動流淚。唱到《敢愛敢做》時，Alex再次出場送公仔給歌迷。接着阿Lam講到香港多年來發生很多事，當中有好有不好，其中更有感大家沒有了禮貌和愛心，之後便唱出《愛心之歌》。到了Encore環節，阿Lam問觀眾：「你哋唔眼瞓咩？我有啲眼瞓，好啦，再要就整多隻畀你哋啦！」之後唱完幾首快歌後，演唱會圓滿結束。
最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

on.cc東網專訊 | January 30, 2016

歌手林子祥（阿Lam）演唱會請來老婆葉蒨文（沙麗）、仔仔林德信（Alex）、玉石樂隊及舊同學王正宇任嘉賓，阿Lam多次感觸落淚場面感人，期間大銀幕仲播出阿Lam的爺爺嫲嫲照片。阿Lam、沙麗及Alex一家三口化身美國三人組合Peter, Paul and Mary，三人合唱經典金曲《 Lemon Tree》，阿Lam介紹兩人出場說：「一個人唱唔到呢首歌，搵番Peter同Mary出嚟。」沙麗同Alex由台中行出場，抵死的阿Lam說：「生佢出嚟有啲用。」由於沙麗穿上花花裙，阿Lam說：「頭先出嚟唔係咁，依家穿晒花。」沙麗笑說：「老吖嘛。」唱罷，沙麗主動說：「我有嘢想講。」

爆《零時十分》喺馬桶上創作
由於她早前在《第38屆十大中文金曲頒獎音樂會》以頒獎嘉賓頒獎給獲得「名人堂」的阿Lam時，未有時間給她說話，沙麗說：「上次你攞大獎，我冇機會講嘢，依家補番。」並取出貓紙，Alex見狀即捉住老竇坐低，沙麗隨即踢爆老公幾個怪癖好，她說：「我覺得佢好有才華同係萬能藝術家，我想講佢啲怪癖，佢喺屋企講嘢好細聲，但佢一上台就好大聲，唔知係咪留番上台用。」接住再爆：「佢好多架車，有成五架，佢成日走落去洗車同車講BB話，但我問佢一陣會坐邊架車，佢就話唔用車坐小巴，話小巴好快，仲話佢依家有長者卡，但我仲未到（65歲）。」隨即又指阿Lam非常貪靚及愛買名牌，沙麗說：「佢好鍾意着衫，佢成日買名牌。又好鍾意去救世軍買衫，話好平、好抵。」沙麗透露當年獻唱由對方寫給她的歌曲《零時十分》是在馬桶上創作，她說：「當時唔敢問佢，多謝佢，佢見我冇咁開心，見你哋先咁開心。」並高呼：「你係標準真的漢子。」

提早拜年「祝香港好」
個唱上阿Lam獻唱多首已故歌手、填詞人的歌曲，包括梅艷芳、林振強及黃霑。當大銀幕播放已故演唱會之父張耀榮照片時，阿Lam說：「佢幫過太多人，個個歌手都好多謝佢。」並表示香港過去多年太多轉變，更即場與歌迷提早拜年，阿Lam說：「猴年個個變孫悟空，祝香港好，個個對大家都有禮貌，希望大家畀多啲愛心。」
騷後阿Lam解釋感觸原因，他說：「見到好多見住佢哋大，用音樂影響咁多年係感觸。」對於被沙麗踢爆怪癖，阿Lam笑說：「唔知佢講咁多，嗰次冇機會畀佢講，留今次去講，其實好多人都知。（話你啲車唔揸？）我嗰啲係古董車，唔係名車，要我坐勞斯萊斯唔敢畀人見到。」

on.cc東網專訊 | January 29, 2016

前輩歌手林子祥（阿Lam）為將於下周舉行的演唱會進行綵排，即席唱出《最愛是誰》等歌曲，期間老婆葉蒨文（沙麗）更現身支持，而現場有一隻可愛小狗，兩人忍不住與狗狗玩。

唔夠時間唱晒成首歌
阿Lam表示昨日已經開始綵排，過程很順利：「今次隊Band係我熟嘅，啲歌佢哋彈得好多唔同款，差唔多乜款歌都會唱。今次都好多歌，分分鐘唔可以唱晒成首，而且今次有埋畫面襯托，所以唔似一個演唱會，直情係好似我喺台上帶動一齣戲咁，襯番音樂同畫面。（今次唱幾多首歌？）接近50首，有一、兩首串燒歌，不過都係串兩、三隻歌，唔係《十分十二吋》咁長。（咁多歌，觀眾咪要8點3準時入場？）至好，我就梗喺度啦，不過啲人遲到冇得講。（驚唔驚唱到超過11點半，超時？）應該唔會過11點半，每隻歌兩分幾鐘都完。」

屋企嘢乜都講
唱這麼多歌，可會減少說話時間？阿Lam表示今次反而會多講嘢：「因為有畫面，所以要講嘢帶入畫面同隻歌，先可以令觀眾跟住個過程。（會講感人說話？）主要係講私人、親切啲嘅嘢，講我個過程，又會講屋企、爹哋媽咪、仔女、沙麗。（佢哋會嚟捧場？）會唱埋。（沙麗同囝囝林德信會同台唱歌？）係。（到時會唔會邀請電影女拍檔唱歌？）唔係嗰種，係講我私人過程多過做嘢過程。」
習慣午睡補充精力

他又指現年80歲的英國老師亦會來捧場：「佢係外國人，雖然唔識聽我啲歌，但6、7年前佢第一次接觸到我嘅歌，佢同太太住日本，所以知我40周年就嚟，我個騷亦會講點識佢，所以好有意思。同埋今次開40周年演唱會唔係話自己做過咩，而係最緊要講我成個人嘅過程。」

講到阿Lam習慣早睡早起，但舉行演唱會要夜瞓，現時可會調教睡眠時間以作配合？他表示到做騷才會夜瞓：「不過我就算好攰都只係會瞓四、五個鐘，情願中午瞓一瞓先至開騷。（有午睡習慣？）老人家嘛！」

最強娛樂APP《東網巨星》，除咗特備遊戲節目《巨星放題》外，每個禮拜都仲有好多其他精彩娛樂節目。預知未來，相信好多人都希望做到，《東網巨星》APP其中一個重點節目《玄學星相》，除咗教識大家點樣催吉避凶，仲會以玄學角度，幫大家八盡每周娛樂熱話㗎！

輪到今晚最後一個大獎———名人堂榮譽，由葉蒨文負責頒俾得獎者——佢老公林子祥。

阿Lam先問問身旁的沙麗:「你有冇嘢講？」老婆擰頭。阿Lam笑笑口:「佢喺屋企好嘢講，呢度就唔講嘢。」阿Lam再謂:「好多謝你哋，你哋想我講多啲定唱多啲？」大家話想唱多啲，點知阿Lam話:「過咗40年，我都要講多啲嘢。我第一首會唱嘅，係《千億個夜晚》，原來我仔最愛呢首歌，我都係睇訪問先知。」「最有感受最開心嘅係，我唔單止唱俾你哋聽，仲唱埋俾你仔女，甚至孫女聽，感覺係好好。多謝十大中文金曲，支持我同沙麗咁多年，好多謝咁多位填詞人，佢哋都係我老師，仲有好多朋友……感謝上天俾我仲有氣力唱畸型歌，而且仲有人聽。祝大家，包括沙麗，身體健康。」全場起哄要沙麗錫鍚老公，沙麗初初唔肯，最後由阿Lam做主動，錫咗面珠一啖。阿Lam唱唱下，仲走埋落觀眾席同歌手一齊唱添！

Apple Daily | January 6, 2016

林子祥今晩在香港電台《第38屆十大中文金曲頒獎音樂會》獲頒「名人堂」，由葉蒨文（沙麗）頒獎，林子祥發表得獎感受，二人甜蜜親吻臉頰。

林子祥笑葉蒨文平常在家很多說話，在頒獎台上卻不願多說什麼。林子祥之後表示，唱歌逾40年，要睇訪問才知道兒子林德信最喜歡《千億個夜晚》，林子祥續說：「我最大感受是不止唱給你們聽，也唱給你們的仔女、孫兒，感覺好好。」林子祥不忘多謝港台多年來支持他和葉蒨文的歌曲，也多謝上天讓他還有氣力唱歌，祝願大家身體健康。

明報 | January 6, 2016