林子祥（Lam）與林德信（Alex）、葉蒨文（Sally）和媽媽三代同堂，出席自己有份參與設計的品牌發布會，場內掛有多幅阿Lam繪畫的畫，他笑言現在已很少拿起畫筆：「中學開始畫，儲埋好多年，不過畫到有老花同散光，依家畫唔到喇！」

阿Lam的細女林德怡上周五誕下女兒，升格做公公的阿Lam一講到孫女即笑個不停：「梗係開心，今晚我媽媽、阿仔都係到，差個女同baby仲係醫院，差啲四代同堂！」他和Sally均指孫女似媽媽多些：「佢最特別係隻手同腳都好大，手指又長，希望佢會高，佢daddy好高大。」

問阿Lam會否催Alex早點結婚？他即瞪大眼，並揶揄Alex說：「結咩婚？日日夜蒲！」Alex即面紅地急於澄清：「我努力工作o架。」阿Lam繼續笑他說:「你努力夜蒲！」令Alex非常尷尬，他說：「我好少喇！我好少同daddy傾偈，佢都唔知現實係點，都係靠睇新聞先知。」阿Lam繼續窮追不捨說：「佢啲嘢我都係要問你哋（記者）先知！（佢有冇帶女朋友畀你見？）邊個先？」然後隨即反問Alex：「你有幾多個？」Alex一臉尷尬地說：「我有好多朋友，我鍾意有好多朋友，開心啲。」最後阿Lam亦為他打圓場說：「佢自細就多朋友，男女都有！」

朱玲玲特別到中環支持好友林子祥（Lam） 有份參與設計的品牌發布會，並與一眾賓客講個不停，心情甚靚，她大讚阿Lam有才華：「睇得出佢係一個藝術家，做歌手都係一個藝術，依家睇到佢多一面，睇得出佢好細心。」好友葉蒨文（Sally）則倚在朱玲玲身旁聽她讚老公阿Lam，非常搞笑。