透視Tee行名店 55歲葉蒨文咬手指等車

林太葉蒨文呢期曝光率好高,幫李克勤演唱會做嘉賓,又出席健康講座談保健心得,風采依然,最重要愛打羽毛球嘅佢真係Keep得好,有腰有Pat有線條,邊似55歲?日前下午,着半透視Tee加粉紅貼身褲嘅林太同助手去銅鑼灣行名店,齋行無入手,老銅馬路秒秒塞,咬住手指等車嘅林太等到無晒表情。

好鍾意喺牀做拉筋同做一字馬嘅葉蒨文有鋪驗身癮,佢話︰「好多人嫌做身體檢查麻煩,我就特別鍾意做體檢,每隔三至四個月就做一次。」咁勤力驗身全因為安心兩字,因為佢要有健康嘅體魄先有能力照顧屋企人。

無嘢好買

日前下午四時,戴住黑超嘅葉蒨文同女助手喺銅鑼灣行街,先去Gucci再去利園嘅LV,入LV全因喺櫥窗見到對短Boot,見佢同Sales密密傾又不斷摸住對Boot,唔覺意留意到,佢件Tee原來好透吓。林太齋問無試就離開,喺利園門口等車,因為車多擠塞等咗好耐,佢等到咬晒手指好唔耐煩,之後索性行去跑馬地方向會合司機,沿途見到Fila大減價,佢又入去睇吓運動衫,又係得個睇字。

頭條日報 | September 15, 2017

葉蒨文笑林子祥食嘢似雀仔:啄少少咁食

歌手葉蒨文(Sally)出席世界心臟日講座任演講嘉賓,Sally表示生活要保持開心,注重生活方式如飲食和運動,例如她出街食飯要走十多條街,她會選行八條街先搭車,她在家中亦不時做運動,每朝起床都拉筋十分鐘,瞓前又會練一字馬,當一隻手搽面,另一隻手就會練拉丁舞手勢或者羽毛球扣球手勢,總之會利用每分每秒。問到老公林子祥(Lam)可同她一齊做運動?Sally謂:「佢喺另一間房,佢好Fit,好Slim,大家各有各方式做,我係打羽毛球、高爾夫球同跳拉丁舞。阿Lam佢食嘢似雀仔,啄少少咁食,佢唔食就推埋畀我,我會打包走唔會浪費。」

問到可有跟兒子林德信做瑜伽?Sally坦言:「太驚熱,試過一次喺屋企做瑜伽,但好熱,可能遲啲再試啦。」提到日前做李克勤演唱會嘉賓,她表示以前有一齊打羽毛球,但現在時間很難夾,Sally笑言認識克勤很久,早於無綫節目K-100年代已認識。問到何時到開演唱會?她笑言:「Oh My god!我未到,可能我老公開先,暫時未有計劃,但都希望開,因為我都好掛住啲歌迷。」

on.cc東網 | September 10, 2017

床上都要做運動 葉蒨文:我張床都有羽毛球拍

葉蒨文今日喺銅鑼灣出席世界心臟日講座,向大家分享健康心得,佢話生活要保持開心,亦要喺飲食同運動方面着手:「如果出街食飯,相距10幾條街,我會選擇步行,喺床上面又可以做運動,例如起身拉筋,做一字馬。」老公林子祥(阿Lam)要唔要落床先?葉蒨文指阿Lam係瞓隔離房,佢繼續話:「我張床都有羽毛球拍,揮動下可以練手腕,喺飲食方面,食飽就停,或者一日多餐,阿Lam好fit,乜都會好小心,佢食嘢好似雀仔咁。」

有冇同林德信(Alex)一齊做瑜伽?葉蒨文話:「冇呀,試過喺屋企幫我做過幾下,但係我怕熱,我最鍾意打羽毛球、跳拉丁舞同打高爾夫球。」講到佢日前擔任李克勤演唱會嘅表演嘉賓,葉蒨文表示:「我哋以前都有一齊打羽毛球,其實喺《K100》已經識佢同古巨基。」問佢幾時開演唱會?佢話:「oh!my God!我暫時未有計劃,我老公可能會開先,我都好掛住觀眾,撞到時間就very good。」

Apple Daily | September 10, 2017

葉蒨文的養生之道 記住呢三點

在香港铜锣湾某图书馆出席健康讲座,并向观众分享健康心得。问道Sally姐平时会不会和老公阿Lam一起做运动,Sally姐就透露两人各自都有各自喜欢的运动,自己喜欢跳拉丁舞多些。Sally姐最近为李克勤的演唱会担任了嘉宾,「有沒有搞到自己很想开演唱会?」Sally姐就说自己都想,希望传递正能量给大家。

魔方全媒 | September 10, 2017

克勤唱到喘晒氣?葉蒨文笑問:你冇事嘛

歌手李克勤昨晚的第6場紅館演唱會可謂星光熠熠,吸引汪明荃、李嘉欣和家姐夫婦、甄子丹夫婦與兒子、蔡一智、梁漢文及再次捧場的徐濠縈,身為李太的盧淑儀帶同兩個囝囝到場打氣,而是晚嘉賓則是葉蒨文(Sally)。

葉蒨文透視現身

克勤大讚Sally是個很認真人,他說:「呢位嘉賓係咁多晚表演嘉賓中最認真,前兩日已經嚟綵排,好明顯係我前輩,事關依家啲後生仔女係唔會咁做,舊年喺《我是歌手》節目入面,呢位世外高人已經幫過我,佢亦攞過好多次『最受歡迎女歌星獎』,係香港No.1女歌手,大家應該估到係邊個。」穿上透視裝的Sally現身舞台,並與克勤合唱了《信自己》,由於兩人邊唱邊跳,期間Sally跳到要抽一抽裙頭。

擺阿姐上枱

抵死的克勤問Sally的鬍鬚佬(林子祥)在那裏?Sally說:「今朝有打個電話畀佢,當時佢喺美國洗緊衫,佢好鍾意做家務,到你60周年演唱會,佢就會回來,其實佢唔嚟都唔緊要,我哋都可以唱佢嘅歌。」隨即兩人合唱林子祥的《數字人生》,由於兩人唱到喘晒氣,Sally笑說:「唔怪得老公唔嚟。」克勤打趣笑問有沒有氧氣筒,Sally說:「你冇事嘛?30周年啫,你仲可以繼續唱。」克勤認同說:「係喇,阿姐(汪明荃)50周年都冇事,我點會有!」Sally有意即時請阿姐上台,不過她最終與克勤清唱了幾句阿姐的《萬水千山總是情》以答謝對方捧場。

on.cc東網 | September 9, 2017

Next Posts